नाशिक : येथील सायबरतज्ज्ञ तन्मय दीक्षित यांना अमेरिकेतील ‘हॉल ऑफ फ्रेम’ पुरस्काराने सन्मानित करण्यात आले आहे. इंटरनेटवर सुरक्षित असलेला डेटा हॅकरकडून चोरीला जाऊ शकतो, हे कायदेशीर पद्धतीने पटवून दिल्याबद्दल तन्मय दीक्षित यांना अमेरिकेतील सैन्यदलाचा ‘हॉल ऑफ फ्रेम’ सन्मान प्रदान करण्यात आला.
अमेरिकेसारख्या अत्याधुनिक तंत्रज्ञानात प्रगत असलेल्या देशात हॅकर्सची संख्या वाढत चालली आहे. देशाची महत्त्वाची माहितीदेखील सुरक्षित नाही. सायबर गुन्ह्यांचे प्रमाण वाढत आहे. त्यामुळे प्रत्येकाला सायबर सुरक्षेची गरज भासू लागली आहे.यासाठी तज्ज्ञांच्या मदतीने सैन्यदल, बँका आदी विविध क्षेत्रात सायबर सुरक्षेवर भर दिला जात आहे.
तन्मय दीक्षित गेली अनेक वर्षे सायबर सुरक्षेबाबत प्रशिक्षण कार्यशाळा घेत आहेत. अमेरिकेतील सैन्यदलाच्या माहितीच्या सुरक्षेबाबत त्यांनी दिलेले योगदान महत्त्वाचे असल्याने त्यांना हा अत्यंत मानाचा ‘हॉल ऑफ फ्रेम’ सन्मान प्रदान करण्यात आला. त्यांच्या या यशामुळे नाशिकच्या शिरपेचात मानाचा तुरा खोवला गेला आहे, त्यामुळे सर्वत्र त्यांचे कौतुक होत आहे.